ఇండియన్ సినిమా దర్శకుల్లో తనకంటూ ప్రత్యేకమైన గుర్తింపు తెచ్చుకున్న వ్యక్తి సందీప్ రెడ్డి వంగ. కేవలం రెండు కథలతో ఆయన టాలీవుడ్, బాలీవుడ్‌లో స్టార్ డైరెక్టర్‌గా మారిపోయాడు. ఈరోజుల్లో హీరోలతో సమానంగా క్రేజ్ తెచ్చుకున్న ఆయన, తన సినిమాలు, ఇంటర్వ్యూలతో ఎప్పుడూ చర్చల్లో ఉంటాడు. తాజాగా మహేష్ బాబు గురించి సందీప్ చేసిన వ్యాఖ్యలు అందరి దృష్టిని ఆకర్షించాయి.
“మహేష్ బాబు ఎంతో ప్రత్యేకమైన వ్యక్తి. సినిమాల్లో చూస్తున్న మహేష్‌లో కేవలం 25 శాతం మాత్రమే మనం చూడగలం. మిగతా 75 శాతం అతనిలో ఉన్న అసలు ప్రత్యేకతే,” అని సందీప్ చెప్పాడు. తాను మహేష్‌తో ఓ యాడ్ ఫిల్మ్ చేసానని, నాలుగైదు సార్లు అతనిని దగ్గరగా కలిసిన అనుభవాన్ని పంచుకున్నాడు. “అతను షూ లేస్ కట్టుకునే విధానం, జుట్టు సరిచేసుకునే తీరు, ప్రతి చిన్న హావభావం చాలా ఎనర్జిటిక్‌గా ఉంటుంది. మనం స్క్రీన్ మీద చూసిన మహేష్, బయట అతని తీరుతో పోలిస్తే చాలా తక్కువ,” అంటూ మహేష్‌పై తన అభిప్రాయం చెప్పాడు.
మహేష్ బాబు స్పెషల్ అని చెప్పడానికి సందీప్ తనదైన శైలిలో మాట్లాడాడు. ఒకప్పుడు వీరిద్దరి కలయికలో సినిమా వస్తుందని వార్తలొచ్చాయి. కానీ ప్రస్తుతం మహేష్ రాజమౌళి సినిమాతో బిజీగా ఉండగా, సందీప్ తన స్పిరిట్, యానిమల్ ప్రాజెక్టుల పనుల్లో ఉన్నాడు. వీరి కాంబినేషన్‌లో భవిష్యత్తులో సినిమా వస్తుందా లేదా అనేది చూడాలి.
Follow
Follow
Post a Comment